Sunday, January 24, 2010

وأنا لوحدي !

وأنَا لوحدِي


ساعات بقعد وأنا لوحدِي ..
وأكون مرتَاح ..
ويقفل بابي من بعدي ..
ومفيش مفتاح
وماضي هواكِي في عهدِي
يروح بصبَاح ..
وأنا لوحدِي بلاقي برَاح ..
أحاربْ فيه في دوّامتِك
وطيف شكلك ولون روحك ..
غريق ماسك في عوامتك
تايه في صدَى جروحك
وأنا معاكِي
بحس الدنيَا في إيديّا
وويّاكي , يكون الحرف بهديّة ..
ومن غيرِك ..
أنَا لوحدِي ..
بحس القوة مكبوتة
خيولي كتير ..
ومربوطة .
قعدت لوحدي في جنينَة ..
لقيت وردَة سابِت وردَة
ووردة مالت على وردَة ..
وردَة وحيدَة
مراقبة الشاردة والواردة
بعود أخضر يتيم مكسور
ولون دافي وروح باردة
وجو جميل ربيع وخفيف
ونسمة هوا
تقولش خريف !
سحاب كبير منقوش بعناية
وخضرة واضحة بشكل لطيف
وقالت وردة للتانيَة ..
وأنا في إيدك هعيش عمري ..
وأنَا في بعدك هعيش ثانيَة !
وأنَا جنبكِ يكون قدري .
ربيع نسماتِك الحانية
وشاف الورد طير طايِر ..
يبص يمين , يبص شمَال
يدور حاير
يشوف توأم يطير جنبه
يعيش العمر في دواير
وبدر يقيد وشمس تغيب
وشمس تقيد بدون زاير
وأنَا لوحدي ..
لا أنا مبسوط ولا زعلان ..
بنادي رفيق ومش طايق
ولا إنسان
وكل آلامي تتحوّل
خليط أشجان
وأكوّر جسمِي على نفسي
كما الِتعبَان
وأفكّر فيكي كالعَادة ..
وأقول هنسى ومفيش نسيان ..
يا أجمل وردة في جنينتي ..
عذاب حبّك أكيد إدمان
أكيد اليأس في بعدك
يساوي الفرح في قربِك
بجمع وطرح
ناقص زائد
ناتج حبّك
يكون سعدِي
و تبقى حياتِي من مهدِي
إلى لحدِي
أكيد عارف
وأنا لوحدي !

5 Comments:

ميرام said...

ايـه ده ..!!!!!!!!!!!!!!!!!!!!!!؟؟؟
بجد جميــــــــــلة جدااا
انا مش عارفة ازاي ماعدتش هنا قبل كده
(:
هروح اقرا بقية الادراجات
واقراها تاني
تحيتي

Asmaa Fathi said...

وأنا معاكي
بحس الدنيَا في إيديّا
وويّاكي , يكون الحرف بهديّة ..
ومن غيرِك ..
أنَا لوحدِي ..
بحس القوة مكبوتة
خيولي كتير ..
ومربوطة

جميلة جدااااااااا بس مش عارفة اية علاقة الكلمات الجميلة دي بالكوارث
محتاجة تفسير

عموما دي زيارتي الاولى لمدونتك وان شاء الله يكون في متابعة

تحياتي

الازهرى said...

صديقى العزيز

بجد رائعه للغايه وخاصة مقطع

وأنَا لوحدي ..
لا أنا مبسوط ولا زعلان ..
بنادي رفيق ومش طايق
ولا إنسان
وكل آلامي تتحوّل
خليط أشجان


حسيته كتير جدا

أخبار نشرك إيه وأخبار فكرتك عن الجمعيه إيه

آسف إنى مش متابع المدونات بس غصب عنى صدقنى

شاب فقرى said...

أقولك إيه

أبدعت.... حاجة بسيطة عالمكتوب
كلماتك ملهمة وجميلة ومتناسقة ولا ينفع يتقال فيها غير إنها جميلة

تحياتى
شاب فقرى

شاب فقرى said...

ساعات بقعد وأنا لوحدِي ..
وأكون مرتَاح ..
ويقفل بابي من بعدي ..
ومفيش مفتاح
وماضي هواكِي في عهدِي
يروح بصبَاح ..
وأنا لوحدِي بلاقي برَاح ..
أحاربْ فيه في دوّامتِك
وطيف شكلك ولون روحك ..
غريق ماسك في عوامتك
تايه في صدَى جروحك
وأنا معاكِي
بحس الدنيَا في إيديّا
وويّاكي , يكون الحرف بهديّة ..
ومن غيرِك ..
أنَا لوحدِي ..
بحس القوة مكبوتة
خيولي كتير ..
ومربوطة .

عجبنى أوى الجزء دا

تحياتى

فقرى