Wednesday, January 06, 2010

صوتي 1

مصير مصر معلّق بأيدي مجهولَة , من الذي له حق تقرير المصير الآن في ظل وجود كل هذه التيارات المتشاحنة والعصبة الحاكمة , من أجل مصير افضل , ومن أجل واقع أجمل كان هذا الحوار الذي هو افتتاحية عدد من الكتابات بخصوص الأمر حتى نهايته آخر يناير الجاري , وهذا حوار أول مع الصديقة متقدة الذهن ذكية العقل نيرة حسن العازفة عن المشاركة السياسية :

313: قوليلي عندك كام سنه تحديدًا ؟
نيرة : 22
313: جربتي تشاركي في اي عملية انتخابية قبل كدا ؟
نيرة : لا
313: اعضاء مجالس محلية او محافظة او نواب شعب او شورى او حتى انتخابات اتحاد الطلاب في الجامعة ؟
نيرة : ممم
نيرة : لا
نيرة : المدرسه بس
313: كويس شاركتي في ايه
نيرة : كنت الامينه المساعده على مستوى المدرسه
نيرة : يعنى فى الاتحاد
313: جميييل
313: طيب إنتي طلعتي بطاقة انتخابية ؟
نيرة : لا
نيرة : هو انت عندك بطاقه انتخابيه
313: لأ هعملها وبكلمك عشان الموضوع ده
313: ما طلعتيهاش ليه انتي ؟
نيرة : عشان مش ليها لازمه
نيرة : يعنى انا لما انتخب واقول مش عايزه ده هايمشوه
نيرة : اكيد لا
313: مين اللي قالك كدا .. لو انتي وانا واصحابنا وجيراننا واللي نعرفهم كلهم عملوا وكانوا ايد واحده في الموضوع أكيد هيكون فيه نتيجة .. بس مين اللي بيخوننا من مجتمعنا ؟
313: فيه ناس منتفعة بتخون وهي مرتاحة لأنها بتقبض التمن
313: وفيه ناس مش عارفة قيمة الموضوع ده بتخون وهي مش حاسه لأنها بتسيب البلد تنجر لمصير أسود
نيرة : زيي كده يعنى
313: كلنا
313: 77 % من إجمالي أصوات الناخبين ما صوتش في انتخابات الرئاسة وهيا أهم انتخابات !!
313: إنتي عارفه إن آخر موعد لإستخراج البطاقة في 31 يناير الجاري ؟
نيرة : لا مش عارفه
نيرة : بصراحه مش متابعه الحاجات دى اصلا
313: وان البطاقة دي هيا اللي هتحدد مين هيصوت في انتخابات 2010 بتاعت مجلس الشعب
نيرة : زى ما قولتلك كده حاسه انى تابعت او لا انتخبت او لا مش ليها لازمه
313: ليه يا نيرة ؟
نيرة : يا طارق احنا صوتنا مش ليه لازمه
313: ليه والله ..
نيرة : اراهنك ان كل اللى بينخبوا فى انتخابات الرئاسه دول كلهم بيقولوا انهم مش عايزين حسنى
نيرة : تفتكر بيمشى
نيرة : او هايمشى؟
313: احنا ضد ده وعشان كده بنعمل كده
313: انتخابات الرئاسة اللي فاتت محدش صوت لأن النظام خوف الناس
نيرة : ماهو طول عمره مخوف الناس
313: بس ثقي ان لما انا وانتي ومليون غيرنا نروح ونقول لأ
313: محدش هيقدر يغير
313: والتزوير لما ارادتنا تتجمع محدش هيعرف يزورها ..
313: انما احنا مش عارفين حاجه لاننا مش عايزين حقوقنا
313: انتي تعرفي ان الفرق بين اي اجنبي في انجلترا وابن البلد , الفرق الوحيد بينهم هوا حق التصويت !!
نيرة : الوحيد؟
313: آها هتحسي انك مواطنه منهم !!
313: بس الفرق الوحيد بين حاملين الجنسية وانتي
313: انهم بيصوتوا في الانتخابات وبيشاركوا في تقرير مصير انجلترا وبريطانيا
313: الاجانب لا
نيرة : هى ايه اقرب انتخابات جايه؟
313: إنتخابات مجلس الشعب السنة دي !!!!
نيرة : اها
نيرة : والرئاسه امتى؟
313: بتستخرجي بطاقتك الانتخابية من القسم اللي انتي تابعة ليه
313: الرئاسة في 2011 واحنا بنحاول نظبط نفسنا من دلوقتي عشان لاول مرة نعيش عصر حر بارادتنا و اختيارنا
نيرة : طيب انت قبل كده مش كنت مطلع بطاقه ليه ؟
313: عشان مكانش السن مديني حق التصويت
نيرة : ليه هو من سن كام
313: 18
313: وآخر انتخابات مجلس شعب و رئاسة كانت في 2005 و 2006
نيرة : اها
نيرة : يعنى مش عشان انت كمان كنت شايف زيي ان مش ليها لازمه وانك لو صوت من هنا للصبح صوتهم هما اللى هايطلع بردو؟
نيرة : انت عارف المشكله ايه كمان
نيرة : انى مش عارفه لو فكرت انتخب هانتخب مين اصلا
نيرة : لانى مش عارفه مين الكويس ومين الوحش
313: انتي بتختاري وتكفي حرية اختيارك .. بالنسبة لمين الكويس ومين الوحش فده هيخليكي تدوري على كل واحد من المرشحين وساعتها هتعرفي , ومحدش عالم بالنفوس غير ربنا عمومًا بس انتي بتنوي على اللي بتقدري فيه المسئولية
نيرة : انت تقصد يعنى انى اهم حاجه يبقى ليا صوت
نيرة : مش اسيبها كده زى ما تيجى
نيرة : صح
313: الله ينور عليكي , تروحي تطلعي بطاقتك انتي واصحابك واللي تعرفيهم وما تستهونيش بالموضوع
313: وتشوفي مين ممكن يخلي منطقتكم او حيكم او دايرتكم او حتى مصر زي ما بنحلم

0 Comments: