Thursday, April 19, 2012

لسه الثورة جاية - قصيدة عامية


لسه ال
ثورة جاية
طارق عميرة


أنا الواقف في وسط النار

ومش حاسس

ومشكلتي لحد الآن

أنا فارس

بدأت الحرب بدراعي

في عز الظلم قبل سنين

هتلقي لسه أتباعي

صراخهم في صدى الميادين

ولسه الثورة أهدافها

بتتحارب باسم الدين

وأنا فارس

بفجر حزني في صمتي

ويوجعني كلام الناس

بجبن خسيس

بحور الشمت في موتتي

عشان السعر حرية

فتمني رخيص

أنا ليه الطريق مفتوح وبنكمل

ودم شهيدنا متهدر امام الجمع

كأنه جاسوس وخد حكمه باعدامه

وجلاده وسجانه وحكامه وخدامه

معندهمش عينين وسمع

والزمالة والشباب الثورجي

باقي منهم صوت ودمع

واجتماع في مقر حزب

او حفلة ان ما وصلش منع

هيّا فين الثورة ديّة

وهوا فين دم الشهيد ؟

احنا جبنا العدل ثانية

أو لمسناه من بعيد ؟

احنا حاربنا الفساد

أو واجهنا مشير عنيد ؟

حامي كل السفاحين

وبيعاملنا كالعبيد

هيّا فين الثورة ديّة

واحنا شايفين مسرحيّة

سفاح مرشح للرئاسة

ونفي علني لثورجية

والغلابة في كل حارة

أمنياتهم العادية

أي واحد والسلام

يمسك المركب ويغرق

لو هيجعلها حطام

المهم الساقية تمشي

مش مهم للامام

حتى لو هنبوس بيادته

او يلجمنا بلجام

المهم الأمن يرجع

يمنعوا كتر الكلام

هيّا فين الثورة ديّة

واحنا قلنا لقياداتها

يا مخبرين

واحنا قلنا لمخبرينها

يا قيادات

واحنا قلنا لراكبينها

يا مظلومين

واحنا قلنا عالشهيد ارتاح خلاص

دفع التمن حتى لو هيموت حزين

واحنا تاجرنا بدمه

صفقات لصالح محبوسين

الحي ابقى ولو حرامي

وعالوطن فالله يعين

إيه مساومة وايه مقاومة

وايه معارضة طبالين

والشباب دمه بينزف

اسأل أراضي الميادين

اسأل الإعلام بحاله

وكل صورة جت في باله

اسأل اللي اتخض واقف

واتفزع هوا وجماله

اسأل اللي كان دفاعه

وأي عيل من عياله

وأي عيل من عيالنا

واسأل اللي اتهان في ماله

واسأل الطفل الصغير

دمنا مش من خياله

واسأل اللي بيسألك

هوا ايه بيفيد سؤاله

هوا اللي سال ده مكانش دم ؟

ارواح شباب ثاير عظيم ؟

هوا الجريمة مكانتش كاملة

عشان حفظها واحد لئيم

هوا كام مليون مشافش

الدم سايل عالطبيعة

هوا كام مليون مشافش

عالهوا اساليب وضيعة؟

هيّا فين الثورة ديّة

واللي شافوا واللي شهدوا

واللي حقوا واستحقوا

واللي حكموا بالوصية

واللي قعدوا فوق مصاطب

واللي لسه في السجون

كلهم باعوا القضية

لما كنت سألت نفسي

هيّا فين الثورة ديّة؟

لما ردت يوم عليا

اتبسطت أنا روحي حيّة

لما كانت الاجابة

هيّا لسه الثورة جايّة !



Wednesday, March 28, 2012

الزمان ده .

مين اللي قال اننا
ما ينفعش نشتم في الزمّن
هنكون ملايكة كلنّا ؟
لأ يا أخي
الكون كدا دايمًا حزين
فيه من ملايكة ومجرمين
كان فيه ميزان
لكن الزمان ده
فيه الملاك عايش عشان
يبقى مهَان وسط الوطَن
يبقى عبيط وسط صُحاب
مالي عقولهم العفَن
وإن مرة حاول يبتسم
هيكُون وحيد ماسك كفن
كل المحيط بيه من بشر
حبّة آلات من غير مكَن
يبقى الملاك يشتم في مين ؟
فيه حدّ تاني غير الزمّن ؟

Tuesday, March 27, 2012

التدوين وسنينه !

منذ متى لم أدخل هنَا بغرض التدوين ؟
عام ؟ اثنان ؟ لا أعلم بالتحديد ..
منذ فترة ليست بالقليلة وأنا أعتزل التدوين , من آن لآخر كنت أضع موضوعًا أراه هامًا لي يحتاج لأرشفة فأضيفه إلى المدونة ..
لكنني لم أزر أحدًا من المدونين وقد كان لي منهم أصدقاء ومعارف
هؤلاء لهم أعتذر وأتمنى أن يصفح عني من يقرأ هذا الكلام منهم خاصةً أنني أعرف أن بعضهم تابعني لفترة طويلة حتى يأس من عودتي للحيَاة .
هائنذا أعود ..
عبر موقع الفيس بوك كنت أكتب وأنشر الكثير
وهذا مستمر ولكنني عدت هنا لأكتب بعض الكتابات الخاصة
مقالات شعر قصة , ليس هذا هو الرئيسي ..
هذه المدونة هي عالمي وفيه سأكتب كما يحلو لي ..
ذكريات مريرة حملتها لي وأشخاص كانوا أعزاء ثم لم يعودوا موجودين من الأساس ..
كتاب كبار عرفوني وشجعوني ورفقاء رأوا فيّ موهبة لم يبخلوا برأي دافع للامام أو نصيحة مفيدة لأصير أفضل
لا ننسى كذلك أن هناك من يدخل خصيصًا للشتم وبهؤلاء أسعد ولهم قلبي يطرب أما الآخرون فهم من أجلهم سعداء
الكثير من التفاصيل التي لا ولن تفيد أحدًا سوى التأثير على عقلي العبقري ! ..
مبروك على التدوين عودتي
!
طارق عميرة
كارثة .. في الطريق إليك