في الصحرا لوحدي

أصيح والسيف مزروع بخاصرتيييييييييي

والغدر حطم .. آمالي العريضات

جامد كاظم ده وهوا عامل صداع دايم كده

وبناءً عليه فالسادة القراء مدعوين لقراءة القصيدة القادمة المحنكشة , هيا مش قصيدة ولا شعر بس اسمحولي اتعدي عالشعر العربي واقول اني هصنفها قصيدة , و ان شاء الله تعجبكم

الموضوع الجاي باذن الله .. اللي بعد ده هيبقى ساخر .. ولمن لا يعرف كوارث في الساخر .. فالساخر هو الاصل .. والاصل هو الساخر .. عشان الناس بدات تشتكي من سواد الموضوعات وبتاع ..

غير كده كل اللى دعالي في امتحاناتي طبعًا مش عارف اشكركم ازاي وربنا يستر في النتيجة .. استمروا .. لسه فاضل امتحاناتفي الصحرا لوحدي

طارق عميرة

- 1-
أنا جندي واقف في مكاني ..
وسلاحي على كتفي واجعني
ورصاصة غادرة تاعباني
انا واقف في الصحرا لوحدي
مستنّي الدورية تعدّي
مستنّي الراحه الأبديّة
مستنّي والحيرة واخداني
انا مع مين ؟
مع واحد ظالم وأخويا ؟
ومظاليمه همّا اخواني
ولا مع النّاس اللي قصادنا ؟
وانا واقف في الصفّ التاني ؟
يبقى أنا مع الاتنين !
بس اسمع صوتهم بوداني
او اشوف واحد بعينيا
وانا همسك فيهم باسناني
أنَا جندي واقف في مكاني ..
انا واقف في الصحرا لوحدي ..
***
(2)
شبح لناس جايين بعيد ..
للحظة حسّيت إنّي سعيد ..
قربوا مني ..
طلعوا اصحابي ..
واحد شافني قال للباقي..
فجاة لقيتهم قرّبوا أكتر
قلت بصوتي الله أكبَر
محدّش رد
واحد منهُم رفَع سلاحه
وادّى للباقي أوامر
ببص لميت مدفَع قدّامي
قال يا شاويش
قلت أفندم
قالي يا خاين بعتنا ليه ؟
ذنب الشهدا بتوعنا ايه
دم القتلى مالي الأرض
قلت يا باشا
بص لرجلي تلاقي رصاصة ..
بص لكتفي تلاقي جروح
بص لدمي تلاقي دمّي
من كتر تعبِي بيروح ..
بقسوة رماني بنظراته
وبحزم بصّ لرجالته
وانا جندي واقف في مكانِي
أنا واقف في الصحرا لوحدي
***
(3)
أنَا جندي قاعد في مكًَاني
والجوّ انا شايفه ظلام في ظلام ..
حسست بايدي حواليّا
أربع جدرَان
والصوت الصادِر من نبضي
بصدَاه هيمَان
والدم النازِف من جرحي
بينزِف من روحي كمَان
صدَاع خفيف دخل عليّا
يمكن من كوني عطشان ؟
يمكن من الألم الممتع ؟
يمكن يمكن ..
بس أكيد يمكن علشان
أنا جندي قاعد في مكاني ..
أنا قاعد في الضلمة لوحدي
***
(4)
بابِ انفتَح ..
ضوء صغيّر بس عمَاني
فتّحت عيني
لقِيت طبَق
وصوت يقول :
كل يا شاويش
مش هآكل
افهم بسّ انا مع مين !
اعرف بسّ انَا هموت ..
ولا هعيش ؟
واليوم التاني نفس الشغل
كل يا شاويش ..
مش هآكل
أنَا عايز ميّة عشَان دمّي
انَا عايز شرح يزيح همّي
انَا عايز أمُوت !
(تلطيش )
كل يا شاويش
قفل الباب ..
وانا جندي قاعد في مكاني
ورجعت للضلمة لوحدي !
***
(5)
البابِ انفتَح
غمضّت عينيّا عشانِ النُور
مستني الطبق المستور
طلعت ايد بتصحينّي
ووراهَا عدُو
قال يا شاويش
احنَا شاكرين لجمَايلك
منبهرين بعمَايلك
حرّرنَاك
وقتلنَا زمايلك ..
يلّه معانَا عشان نداويك
اوعى الحرّ يأثّر فيك
الوحدَة ..بعيدَة شويّة
***
(6)
انا ماشي معاهم في الصحرا
انا ماشي مش فاهم حاجه
ولا عايز افهم
صاروخين سام جابوا الوسط
انا أوّل جندي معاهُم نط
وآخر جندي
اشلاء وجثث حواليّا
كانوا زيّي من لحظات
فجأة لقتيني لوحدّيَا
والباقي كلّه أموات ..
بصّيت بعينيّا
موقفي يائس
أنا جندي واقف في مكانِي
أنا واقِف في الصحرا لوحدي