Monday, May 12, 2008

أقرب الأحباب .. في مستقبل مصر الهباب

مرحبًا يا أصدقاء
نستهلّ موضوع اليوم بسؤال عن مصير أقرب الأحباب .. في مستقبل مصر الهباب !
السؤال صعب جدًا طبعًا
الموضوع ومَا فيه
من كام سنَه كانت نغمة التعليم عالية قوي , كانت أهالينا مهتمة قوي بموضوع التعليم ده , يعني انا مثلا والدتي كانت رئيسة قسم في جامعة ووالدي رئيس شعبة محاسبات - الله يرحمه - وشيخ في الوقت نفسه , عشان كده كان التعليم حاجه مقدّسة , مفيش اي مجال لاي حاجه تانيه لغاية ما التعليم ده يخلص , وده اللى كل اخواتي نجحوا فيه تقريبًا باستثناء العبد لله هوا اللى مدي التعليم بالجزمة القديمة
يعني عندي اتنين طب اللهم صلي عالنبي والاخ الاكبر خريج لغات وترجمة ازهر بجيد جدًا مع مرتبة الشرف وطبعًا تفوقه كان الاستثناء الوحيد لانه يتعين بعد سنه بهدلة تقريبًا بس زملاته بقه .. اللى عملوا اللى عليهم او اللى ما عملوش بس كانوا بيتعلموا .. مش كلهم اشتغلوا ومش كلهم اتوظفوا وانا مش هفتح في حوار البطالة وازاي خريج الصيدلة بيشتغل سواق تاكسي والكلام ده
بس الجيل بتاعنا تقريبًا معظم افراده كانوا في وقت من الاوقات في بيوتهم برضه التعليم ده حاجه مقدسة , دلوقتي قداسة التعليم بدأت تختفي , من كام سنه كنا بنبص للطالب اللي بيتعلم وبيشتغل على انه مكافح وربنا هيكرمه لانه جاي على نفسه شويتين
دلوقتي بنبص للطالب اللي بيتعلم وما بيشتغلش على انه رقيع ومش نافع ببصلة !
والمشكلة ان اللى ما بيشتغلش بياخد نظرات الشفقة لانه مش هيعرف يعمل حاجه , واللي بيشتغل بياخد نظرات العطف لانه مش عارف يكفي احتياجاته , احنا بقى رايحين على فين بالظبط ؟
لما سيادتك تتجوز ان شاء الله او لو كنت متجوز حاليًا .. بصتك للتعليم واهميته لابنك دلوقتي , تفتكر هيا نفسها كانت اهمية تعليمك لبيتك ؟
وهل انتا مهتم بتعليم اولادك اصلا
ولا شايف انها مش فارقة
اهو كده عايش وكده عايش وكده ميت وكده ميت
شغل دماغك وفكر
انتا شايف مستقبل اولادك ايه بالظبط في ظل الوضع الحالي
طبعًا لو مفيش تعليم هيبقى فيه بدائل تانيه .. بس المشكلة ان كلها كارثية
ربنا يستر
!!

27 Comments:

Fathi said...

انا شايف ان الكلام مش علي اهميه التعليم او لا فالتعليم زي منت بتقول حاجه مقدسه يعني مهمه جدا
ولو بصيت لليابان مثلا نجحو لانهم طورو التعليم

المشكله ان التعليم في مصر فاشل بالمعني الحرفي للكلمه
يعني كل الناجحين في المدرسه مش بالضروره يبقو هما هماهم الناجحين في الجامعه
ولو اتخرجو ممكن يكونو فشله في شغلهم
واعتقد ان يفي مهندسين كتير مش متفوقين وبقو انجح شركات في شغلهم
دا بيرجع ان التعليم عندنا سطحي جدا وان اللي بيعتمد علي نفسه انه يعلم نفسه اي حاجه ممكن ينجح اكتر من اللي اتعلم في اعرق جامعه في جمهوريه مصر العربية
دا رأيي

كوارث said...

انتا بتواجه المشكلة من بعد آخر يا فتحي
سيبك من مستوى التعليمك لان مش ده النقطة الرئيسية
بس هيا نقطة مهمة فعلا ..
طيب .. في ظل المستوى المتدني للتعليم ..
هتهتم بتعليم اولادك ؟؟

Fathi said...

اه

Sally said...

المستقبل بيد الله اولا واخيرا
بالنسبة لخطتى ان شاء الله فى تعليم ابنى
فهحاول بقدر المستطاع انه يتعلم كل حاجة .. كل المهارات اللى ممكن تنفعه فى مستقبله بس أتمنى ان يستجيب
وأهم حاجة عايزة أعلمهاله الرضا .. والإرادة الصلبة اللى تخليه يحقق المستحيل ..

اما زوجى .. فيفضل ان يعلمه كرة القدم ويلحقه بالنادى الاهلى

دمت بخير أخى
وأشكرك على زيارتك لى
سالى

أسرار أنثى said...

عموما الوضع يختلف بين مصر و الجزائر قليلا
لازلت لم أفكر في ذلك ربما سأتركها لوقتها

تايه في وسط البلد said...

مرحبا يا ابو الكوارث!!ه
شكلك كده دماغك مفلوقة باللي حواليك زيي وهنتجنن لما نقول يا بس


اما بقي من حيث التعليم في المستقبل فمصيره سيكون مثل الاقتصاد
وزي الصحة
وزي التجارة
وزي الزراعة
وزي الصناعة
وزي الثقافة
اظن واضح ولا ايه؟

لورنس العرب said...

تعرف ان على الرغم من أن اعداد الخريجين من الجامعات و العاطلين عن العمل في الليمون
لكن بردو لسه التعليم له بريقه بين الناس
وخاصة بين ما كان يطلق عليهم في السابق الطبقه الوسطى- التي أختفت حاليا-
لأن ما فشلوا في الوصول إليه يحاولوا يعوضوا أولادهم في التعليم
فتجد الرجل في قمة الفرح عندما يلتحق ابنه بكلية الطب- وهو يعلم تماما انه عندما يتخرج سيعاني، ولكن بردو بيكون فرحان
ولعلمك- انا لو اتجوزت وخلفت هاكون بردو فرحان لو حصل كده مع أولادي- على الرغم طبعا من ان أيامهم هاتكون أكثر صعوبه، لكن التعليم و دخول الاولاد كليات حلوه الشيء الوحيد اللي بيرفع من الروح المعنويه للأهل وسط كل المعاناه الموجوده حولنا، صحيح الواحد بيجيله احباط من أجور الممثلين و لاعبي كرة القدم وغيرها، لكن يظل التعليم هو اول ما ننظر إليه

mostafarayan said...

اي اب بيحب ابنائه يكونو احسن منه فطبيعي لمات تكون خريج جامعة تحب اولادك اقل حاجة يكونو جامعيين
اما البدائل الأخري فدةحسب زمانهم هما مانقدرش نحكم دلوقتي
تحياتي ليك

appy said...

مشكله التعليم فى اللى بيتعلموا ومش بيستفيدوا بيأخدوا شهادات على الحيطان وبس
يعنى المشكله فينا بجد

كوارث said...

سالي
جميل جدًا الكلام ده طبعًا
ولو كانت ده خطتك فعلا لتربيته واثنفذت باذن الله ابنك هينشأ حر في وطن حر وجيل حر
الله يوفقك في تربيته ويوفقه في حياته
بس من ردك اعتقد انك هتعتمدي على نفسك وعلى جوزك اعتماد كامل في موضوع التعليم ده .. يعني هيكون فيه متابعة دايمة ..
جميل الاهتمام ده
ويا ريت يكون موجود عند الكل

كوارث said...

اسرار أنثى
شكرًا لزيارتك
ربّما الاوضاع مختلفة ولكن لا اظنها مختلفة الى حد كبير
التعليم في العالم العربي كله متقارب في المستوى تقريبًا باستثناء الجامعات الاجنبيه والتي تسوق افكارها وسط ما تعلّمه !
وبالتوفيق ان شاء الله

كوارث said...

أهلا يا تايه ..
صبح تاتا اتنين في تلاته
اهلا يا زميل الكفاح ورفيق رحلة الجنون
بالنسبه لموضوع التعليم
فالتعليم اصلا هوا عمود الحاجات ده كلها
ان المهندس والطبيب كليهما لولا رجال العلم لم يتقدما
يعني التعليم هوا اللى بيخرج دكاترة ومحاسبين واقتصاديين ومهندسين ومدرسين ومحامين والخ الخ
يمكن لو انتا ملاحظ كل اللى ماسك منصب كويس عندنا لازم فترة في درايته كانت برّة .. بيبقى عليها الاعتماد في تعيينه !!
جمال مبارك مثلاً - نجل الرئيس المصري - كان في جامعة أمريكية !!
ده غير انك ما قلتش ..
مهتم بتعليم ولادك ولا لأ

كوارث said...

لورنس العرب
الله عليك
انتا جايب الحس الجمالي للموضوع
فعلا
يمكن قدسية التعليم من البداية اصلا وكل واحد مهتم بتعليم ولاده عشان يشوفهم ناجحين في اللى هوا ما نجحش فيه
والامل ده هيفضل موجود طول ما في ناس بتنجح في العالم ده عن طريق التعليم
ويمكن ده دافع معظم الشباب اللي بيتعلموا دلوقتي
حاصة ان فيه بعض الاماكن في الدولة - مش كتير - لسه بتعين الكفاءات والناس المتفوقة فعلاً
بس الله أعلم آخرهم امتى
جميل الامل الموجود عندك
وربنا يكرم الجميع

كوارث said...

مصطفى ريّان
المشكلة اني لسه طالب جامعة
و التعليم حاليًا حاله ما يعجبش نهائي
ربنا يستر ونقوم بالسلامه
شكرًا لزيارتك

كوارث said...

appy
وازاي نستفيد من وجهة نظرك ؟.
انتي عارفة ان لو حد لقى شغل بمؤهله يرضيه هيشتغل فيه بدون تردد
العيب مش فينا ولا بتتعلق بمزاجنا
الشهادة لو ما ااتعلقتش عالحيطة
هتترمي في الزبالة !
ولا ايه رايك ؟

جني said...

كوارثي
كيف حالك وعامل ايه
سيدي الفاضل الناظر للهدف من التعليم بشكل سطحي على انه وظيفة وبيت مفتوح فأنا لست مع هذا الرأي .. التعليم أولا يجب أن يكون عبادة لله تعالى فهناك الكثير من الآيات القرآنية التي تدل على ذلك أذكرك بواحدة منها :( يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ وَاللَّهُ بِمَا تَعْمَلُونَ خَبِيرٌ }المجادلة11
ثانيا يجب أن يكون التعليم تحقيق لذاتنا وإحساس بآدميتنا ..
ثالث بالتعليم نبني بلدنا التي نحبها ونفخر أننا من أبنائها ..
رابعا من أفشلوا التعليم لن يدوموا وعلينا أن نستعد لقيادة الدفة وتطوير التعليم ..
معذرة للإطالة
تحياتي
said

Tamer Nabil said...

موضوع جميل

شوف ياصاحبى

رغم اى ظروف لانفر ولاهروب من التعليم لان الانسان الغير تعليمى انسان من السهل بالبلدى كدة يضحك علية


الحاجة صح ان الطفل يدخل المدرسة ويكمل تعليمة وبعد كدة يفكر هيشتغل اية وهيعمل اية

وكل وقت ولية ظروف

تحياتى

Mohamed Gameel said...

من ناحيتنا فالخطة الخمسية تبدأ بوجود أولاد
يعني لما نبقى نعرف نتجوز الأول ياخويا نبقى نفكر هنعلم ولادنا ولا نقعدهم في حجرنا
انا عن نفسي الأهم عندي انه يتعلم من اللي عندهم خبره يتعلم ازاي يبقى راجل وازاي ياخد حقه وازاي يبني ميهدمش ازاي يدي ميسرقش
عشان دي حاجات للأسف عمره ما هيتعلمها في اي مدارس ولا جامعات
وسلملي على التعليم عن بعد

امل said...

ازيك يا كوارث
انا ان شاء الله لو بقى عندي اولاد
ده انا هعمل فيهم عمايل
ان شاء الله من قبل اما يدخلوا المدرسة
لازم احفظهم القرآن واعلمهم كومبيوتر
ومفيش مانع لغات كمان
ربنا يكون في عونهم ده انا هبهدلهم

كوارث said...

جني
مرحبًا يا سيدي الفاضل
نورتني والله .. انا هعمل كافيتريا مخصوص عشان المشاريب للضيوف اللى زي حضرتك هنا في المدونة
بالنسبة لكلام حضرتك
ده وجهة النظر المظبوطة والمثالية للتعليم وبالقيمة ده بيكون التعليم كاهم ما يكون واجمل ما يمكن
الله يوفقك

كوارث said...

تامر نبيل
مرحب يا ريس
نورت مدونتي والله
بالنسبة لموضوع يتضحك عليه ده
فالتلفزيون دلوقتي بيعلم احسن من التعليم في الحاجات ده
ماساة الزمن الحالي ان اللى متعلمين مظبوط هما اللى بيتضحك عليهم !!
ولا انتا شايف ايه حضرتك ؟
لو قصدك انه يكون مفتح فده مش المفروض تعليم مدارس .. ده تعليم تجارب وواقع , تعليم المدارس تعليم افادة للمجتمع مش حماية شخصية
شكرًا لزيارة حضرتك

كوارث said...

محمد جميل
زيارتك جامده يا باشا
صح كلامك طبعًا
المفروض ندور عالولاد الاول !
وجميلة قوي المباديء اللى عايز تعلمها لاولادك
بس متقولش كده احسن يتقبض عليك بتعمة تغيير سياسة الدولة !!

كوارث said...

امل
الحمد لله انا كويس .. ازيك انتي ؟
نورتي المدونة والله
وان شاء الله يكون عندك اولاد كتير كويسين كلهم
برنامجك اقل واجب طبعًا في حق جيل المستقبل لان جيلنا بيعاني بسبب مشاكل في المجالات ده حاليًا
ويا ريت كل البهدلة تبقى كده

Tamer Nabil said...

انا معاك ياصاحبى

ان الانسان ممكن يتعلم من مدرسة الحياة اكثر مما يتعلم فى مدارس وكليات لكن كنت اقصد مهما كان ان التعليم المدرسى مهم
---
اتمنى اشوفك عندى فى افكار حرة 1

ويكون فى تواصل دائم بنا

لو مش عندك مانع

تحياتى

كوارث said...

يبقى متفقين يا عم تامر وزيارة افكار حرة اقل واجب طبعا.
وزيارتك ووجود تواصل بيننا شرف كبير ليا طبعا.
rewayatnet@hotmail.com
ده ايميلي
وما تحرمناش من زياراتك

princess said...

بص كده كده الواحد لازم يتعلم
بس الحياة الحقيقية بتبتدى بعد متخلص التعليم ده خالص
يعنى انا مثلا اتخرجت السنة اللى فاتت من السن واشتغلت شوية وكرهت حياتى
وبعدين بعمل دبلومة ترجمة
عشان اكتشفت ان الكلية بكل اللى اتعلمته ولا حاجة خالص
فنقطة من اول السطر انسوااااااااا كل اللى اتعلمتون من اول الكيندر جاردن لحد الجامعة
بعد كده هتتعلموا من اول وجديد
اما عن اولادى فى المستقبل ههحاول اخليهم يتعلموا كل حاجة ويعملوا انشطة كتيرة بعيد عن الدراسة عشان مخهم ميوافش
تحياتى يا طارق ونورت المدونة عندى:))

كوارث said...

برينسيس
شكرًا على رايك وردك
طبعًا اؤيدك بس كفاية ان المدرسة والجامعة بيخرجونا بنعرف نقرا ونكتب ..
ده انجاز رهيب والله والمشكلة انه بدأ في الانقراض !!
لك الله يا مصر
نظام الثانوية العقيم لسه طالب ثانوي ازهري بيشتكيلي .. بيقولي امتحان فيزياء اربع مسائل واربع اسألة ومدّته ساعة او ساعة ونص تقريبًا
المطلوب منه ايه ؟
طبعًا واضح ان التعليم المصري بيعامل الطالب على انه سوبرمان
ربنا يستر