Thursday, April 30, 2009

عيد ما بيجيش

عيـــد ما بيـجــيــــش


طارق عميرة
كَان نِفسِي في يوم تلاقِيني
دُكتُور بيعَالج مرضَك..
بيكمّل صورة حلمَك
ويفرّح دايمَا قلبك ..
كان نفسِي أكون فِي غيَابك
الحلمْ إللي إنتَا حلمتُه
واللي اتربيت علشَانُه ..
لكن في غيابك بعته ..
ومسَحت كمَان ألوانه ,
معرفتش إمتَى هكمّل
وطريقي أنَا فين همشيه ..
والحلم وسبَبه اتحوّل
مش لاقي في يوم أراضيه ..
والحَال الحلو اتدهوَر
والحزنْ معمّر فيه ..
كان نفسي أكُون واد صالِح
يدعيلَك كلّ أيّامه..
ويصلّي الفَرضْ بفرضٌُه ..
ويشوف أحوال أعمامه
ويزور الكعبَة في مكّة
يمشي يصبّح بسلامُه
يا سلام لو كنت معايا ..
وأنَا كُنت أفضَل متحيّر؟
ولا كان الحال اتغيّر؟
الله لو ترجع تاني
لو ترجع تمسك ايدي
وتاخدني نروح الجامِع
أو نطلَع على بيت سيدِي
الله لو ترجَع تَانِي
كان يبقَى اليُوم يوم عيدِي

6 Comments:

The Confused said...

الله لو ترجع تاني
لو ترجع تمسك ايدي
وتاخدني نروح الجامِع
أو نطلَع على بيت سيدِي
الله لو ترجَع تَانِي
كان يبقَى اليُوم يوم عيدِي

جميله جدا الحته دي يا طارق

ما شاء الله عليك بجد
كاتب ساخر وناقد لاذع وناقد سياسي ورومانسي كمان

والظاهر لسه فيه حجات كتيييييييييييير مدفونه

استمر واكتسح يا ريس

ومازلتُ أتعلم said...

جميلة جداً
بارك الله فى حضرتك
استمر

enjy said...

حرام عليك يا أخى

Sweet Violet said...

بكتنى بجد

):

reem said...

عارف يا طارق
اول حاجة تستفزنى للتعليق من فترة
وفى نفس الوقت ... مش لاقية كلام اقوله
لاول مرة من فترة طويلة ...اتخنق من فكرة تحليل نص ادبى .. ونقده !!!
نص زى ده ...رده الوحيد جوه القلب ..بأنّة وجع مكتومة
ريم

Unique said...

عيد ما بيجيش .. الحزن بس بييجي

الاحساس اللي ورا الكلام اكبر من اي كلام