Friday, April 24, 2009

زي النهارده من سنة - قصيدة معدلة


زي النهارده من سنه

طارق عميرة


زي النهارده من سنه
كنا في طريق
مالهوش ملامح
ماشيين نخبط
وركبنا سايبة
والدنيا ضلمة
ومافيش فيه لون في الارض فاتح
ومفيش في بكرة اذان جديد
ولا ديك يصيح ولا صبح صابح
وزي بكرة من سنة
كان فيه جديد
النور شديد
والدم في عروقي واصل ابعد وريد
وشعور جديد
مخلي قلبي
سعيد
او كان سعيد
وزي بكرة من سنة
كان الامان
كان الدفا ونور الحنان
كان اللقا
كان كل شيء فات اتنسى
من كام مسا
كان نور عيونك
دنيتي
نا شفت في رموش جفونك
سكتي
ومشيت كتير
لكن نهاية قصتي
دول خطوتين
كل الطريق
لما عيونك غمضت بقى خطوتين
يرجع ورا
كل الأماني
لما عيونك غمضت
اتحولت
حبة رياح متبخرة
كل الأماكن الجميلة
لما عيونك غمضت
صبحت كئيبة
وفي كل ركن منهم
أشياء حزينة
وذكريات
أشلاء قديمة
وقصة من كل القصص
غاوية المشاهدة
ورجعت اقول
زي النهارده من سنه ..
زي النهارده !

8 Comments:

enjy said...

مش بقولك ركز فى الشعر هتكتسح؟؟؟؟

ومازلتُ أتعلم said...

جميلة جداً
استمر

الازهرى said...

كل الأماكن الجميلة
لما عيونك غمضت
صبحت كئيبة

وتظل كلماتك الرائعة تبهجنا
تحياتى دوما

adel said...

ممم شعرك جامد يا بن الاية

بس للامانة و اخيرا

و بسبب ان النت بايظ عاوز ابعت علي الكتاب سريعا لحد ما اعرف انزل رأي فيه

في قصتين من الاخر قوي لدرجة اني فكرت اكتبهم فيلمين قصيرين

الارجوحة - ماذا يفعل

و ما فوق الحب فكرته جديدة

كفاية كلام كده عشان متتغرش

هههههههههه

enjy said...

واد يا دوووووووووولة...ايون طارق باشا جاية ارد على عادل هنا عندك اعتشراض يا فندم؟؟؟؟
المهم
عاجبانى اوى ماذا يفعل ياض يا عادل الله ينور عليك فعلا اختيارات موفقة دة انا مسيحة للقصة دى جامد جامد...ارجوحة حلوة اوى وعميقة بس كلها حوار داخلى دى تتعمل فيلم ازاى دى ياض يا دولة؟؟؟

اساسا الزبون دة جاى من عندى انا -الكلام لطارق- ايون حضرتك هو عرفك من عندى وراح حفل التوقيع من السياح اللى انا عملته ربنا يخلينى ليك يا ابنى وميحرمكش منى..

كمان فى نشوة الم جامد يا عادل ركز معاها حلوة اوى والله وشفافة وحاسة انى اعرف البطل كويس

سلام بقى ايه الرغى دة؟؟
اقعدوا بالعافية

enjy said...

انت يا انسان انت فين الموضوع اللى انا اصدرتلك فرمان عالى انك تكتبه؟؟؟
كلامى مبيتسمعش يا خسارة تربيتى فيك يا طارق.........يللا مش مهم براحتك ما انت كاتب بقى وكدة ومينفعش حد يوصيك تكتب موضوع ....والله صحيح مينفعش اصله مش كيلو لحمة مشوية يعنى
اتمسى بالخير

adel said...

يا انجي عندك حق طبعا و في كتير حلوين بس دول علقوا معايا عشان سيناريو بقي و كده

و الارجوحة سهل قوي اعملها سيناريو بس مش هاعرف انفذها كمخرج للاسف
لانها عاوز امكانيات و ممثلين و انا لسه في الاول يعني
:):):)

هههههههههه

Shimaa Esmail said...

الأستاذ الفاضل / طارق عميرة.
صاحب مدونة / كوارث
" تحية طيبة" وبعد..
لقد أرسلت لك رسالة عبر البريد الإلكتروني مرفق بها دليل العمل والجزء الأول من استمارة استقصاء بيانات عن المدونات المصرية. منذ فترة.
أرجو الاهتمام والرد سريعا، ولعل سبب التأخير خير.
تحياتي وتقديري.
شيماء إسماعيل
باحثة بالماجستير- كلية الآداب جامعة القاهرة.