تاج حـــبيبة .. وأخبَار أخرى !

مرحبًا ..

كل عام وأنتم بخير

بما أنّ هذه المدونة مدونتي فأنا مسئول عمّا سأقوله وهو الآاتي

1- نظرًا لأن الشعر بقى له فترة غايب عن المدونة فسيتم تعويض هذه الفترة بـ " مهرجان كوارث الشعري " على كوارث البوست الجاي ان شاء الله , المشاركون حتى الآن : أنَا , طارق عميرة , ليسَ بهذه الأهمية , والرابع هوا التلاته الأولانيين , زي ما انتوا شايفين التنافس هيبقى شديد , هيبقى فيه اربع قصايد ان شاء الله وربنا يستر

2- قريبًا باذن الله تعالى - شهر ولا حاجه كده - سيصدر للعبد لله اللي هوا أنَا مجموعة قصصية تحمل عنوان " ناثِر البُخُور " ونبقى نتكلم عن الموضوع ده بالتفصيل في مواضيع جاية ان شاء الله

3 - الموضوع النهارده بقه هوا عبارة عن تاج من حبيبة صاحبة مدونة قصاقيص حبيبة وكالعادة عشان اكون امين معاكم مش مسئول عن مدى تفاهة الكلام اللى هتقروه بعد شوية بقه

إلى التاج

هواياتي

هواية معايا من وانا صغير , جمع الحاجات القديمة والغريبة , طوابع وعملات وقريب ان شاء الله هسرق آثار بس قولوا يا مسهل ويكون مستقبلي مشرق في الحاجات ده , زمان كنت بحب الشطرنج اتحول دلوقتي بقدرة عجيبة الى تنس طاولة في بعض الاحيان والرياضة لما بكون فاضي ومنين ما بتطلب لياقة , لو اعتبرنا الرسم هواية فهقولكم اني برسم كتير برضه وربنا يستر عليا من رسوماتي اللى شافوها كلهم بينصحوني احرقها قبل ما اتحرق !

لو قلنا هوايات مكتسبة حاليًا السفر , مبحبش اقعد في مكان ازيد من حد معين لاني بحس بالخنقة , يعني السجن رادع لامثالي فعلا بس ربنا يبعدنا عن ولاد الحرام , كمان لو افترضنا القعاد على النيل هواية فهتبقى ده هواية !

أشهر عيوبي

1- العبط

2- التحكم الشديد أحيانًا- ولو في غلط - بطريقة لا يصلح لمواجهتها سوى أرباجيه !

3- وغد !

حاجات بكرهها جدًا

التظاهر بالذكاء والادعاء و سبب عدائي مع معظم الناس بيبقى : التناكه !

بكره كمان نظام ابو علي صاحبي اذن هو على حق , ورحمة جد اللى جابوا خالتي هو على حق !

دول اكتر حاجتين بكرههم

حاجات بحبها قوي ومش بمل من تكرارها

على راي حسونة

شد القلم واكتب كلام في كلام ..

سؤال بيستفزني

ليه بتقول وغد !

أمنيتي في الحياة

صعب تتقال على الملأ .. احتمال الشماتة له حدود برضه :D

حاجات مؤمن بيها جدًا

لسنَا الذين يمزقون الأشرعة

لسنَا الذين يحركون المقرعة

لسنا سوى بعض النكات الممتعة

فهل الحقيقة .. مفزعة ؟

بس كده

كان فيه تاج تاني كمان بس جاوبته قبل كده ويكفي هذا رأفةً بالسادة القراء