Saturday, September 13, 2008

حد محتاج تاج ؟

تاج مورطاني فيه المدونة ايمي اتش آر صاحبة المدونة المبجلة غلطة مطبعية ورأيت أنَا بحكمتي المتواضعة أن أجيبه الآن رأفة بالسادة الزوار اللذين يتحرقون شوقًا لمعرفة هذه التفاصيل المهمّة جدًا - أهم من الطعام والشراب - فإلى أسألة التاج مباشرة


بدأت تدون من امتى ؟ودخلت العالم ده ازاى ؟

من 2006 تقريبًا مش فاكر الشهر تحديدًا بس غالبًا نوفمبر على ما أذكر , مكسّل أرجع لتاريخ أول بوست بصراحه

دخلت العالم ده ازاي؟

ده حكاية متتنسيش , أنَا أصلا مكنتش مدون ولا فاهم يعني ايه تدوين , بعدين كان اسم الشهرة بتاعي في بعض المنتديات كوارث وبعدين كنت عايز اعمل سلسلة باسم كوارث - وعملتها - و المدونة موقعها , بعدين كان في بنوتة حلوة قوي عرفتني يعني ايه تدوين وبنتلي العالم الجميل ده وانا لا أجرؤ اني أغير أي ركن فيه عشان كده بعتز بالاستايل بتاعه جدًا , كان فيه استايل بدائي على فكرة وهيا غيرته لده بس ده قديمًا.

كان المفروض ان المدونة متغيرة الكتّاب في الأول والبنوتة ده هتشاركني ف الكتابة وبعدين كتّاب سلسلة كوارث بعدين بلطجة خدتها لنفسي وبقت طارقية كوارثية بحتة !

ويكفي هذا !


ايه كان انطباعك في البداية ؟

جامد الحوار ده .. انا بنشر كلام كتير وشكله حلو عالنت !

واحلى حاجه بعيدا عن صداع المنتجيات ومشرفيها!


ايه أهم حاجة اتعلمتها من عالم التدوين ؟

إن العالم في سبعة مليار شخص وسبعة مليار وجهة نظر كلها صحيحة !!!!


ايه أكتر حاجة كرهتها ؟

في مدونات كنت بدخلها بحس اني غبي !!

مش من كتر ذكاوتها يعني لكن تخيل بوست بيقولك مثلا

كنت أسير في الصحراء ولم أجد ماءًا ورأيت السراب فظننته ماء فلم أشرب لأنه سراب ثم اكتشفت أنني في الصحراء وأن ما أراه سراب !!

احساسك ايه ؟ اهي ده بقه المدونات اللى بكرهها


حاسس ان التدوين له تأثير ؟

أكيد طبعًا , بس مع احترامي لكل المدونين

حاسس ان تأثير الشيبسي أحلى !


تهدى التاج لمين ؟

همم سؤال صعب

بس ههديه للاخوة الأعزاء الأفاضل اللي متوقع ان اجابتهم ممكن تكون مفاجآت

الأخت انجي طيّب الله ثراها

الدكتورة جنّة

الكاتب الوغد / محمد الغزالي

وكل من شاء من المدونين


من القاهرة -12/9/2008

21 Comments:

حسن حنفى said...

فعلا فيه مدونات تحسس الواحد انه عبيط

enjy said...

اه ماهو انت لو بتيجى بانتظام كنت عرفت انى جاوبت عن التاج دة اساسا يا معلم.......... عموما اجاباتك كالعادة يعنى لا تعليق

enjy said...

اه بالنسبة للمدونات اللى تحسسك انك عبيط باحس بنفس احساس اللمبى لما بص فى المراية ولقى نفسه رياض باشا...ايوة انا اللى حاسس بس بضرب واحد تانى

Sourah said...

اجابات هايلة يا طارق

بس فيه مدونات تنقط ، تجيب النقطة ،مش عارفة اقول جابتلي النقطة ازاي، اصلي لو قولت هيتعرفوا ، او انا اصلا ما بيتبلش في بؤيي فوله و هفتن، ماعنديش غير ربنا يسهلهم ، و يعرفوا يكتبوا مواضيع مش مستفزة و تجيب شلل خماسي للواحد و هو بيقراها ،،،

اما بالنسبة لحكاية الشيبسي ، متهيألي لو شيكولاتة جلاكسي هيبقى اطعم ..

و اخر الكلام سلاااام

fire bird said...

متهيالى يا جماعة

هى وجهات نظر

وكل واحد من حقه يعبر عن نفسه بطريقته

ولا ايه

والمدونة اللى ما تعجبكش ما تدخلهاش تانى


بس حلوة تاثير الشيبسى احلى دى

princess said...

حلوة حكاية الصحراء والسراب
بس مفيش غير تعليق واحد ممكن يتقال عروستى هههههههه
بس ارجع واقول منحجرش على اراء حد وطريقته فى التعبير:)
اجابات جميلة
تحياتى

عايش ولكن said...

مانت لو بتزورنى وبانتظام
كنت عرفت انى بعتلك التاج ده من بوستين فاتو
عموما معظم اللى قولته انا عارفه
وحكاية المدونات اللى بتحس انك عبيط فده احساس طبيعى يا طروووق يعنى متقلقش انته لسه زى مانت متجننتش

كوارث said...

حسن حنفي
آه والله العظيم يا ريس

كوارث said...

enjy
اهلا اهلا
انا بآجي بانتظام انظم من الدورة الدموية في المريء

واجاباتي رائعة مذهلة جامدة متميزة
انا عارف !

بالنسبة لليمبي
فانا دلوقتي اللى حسيت انيي بنضرب

كوارث said...

sourah
ربنا يكرمك يا رب
طبعًا هايله مش اجاباتي ولا ايه :P
معلش بقه نرجسي - احم - مجنون عظمة - قصدي مضى زمن التواضع
لا من غير ما تقولي
بس حابب اوضح اني اقصد الناس اللى ممكن تكتب احس من كده
انا مش عشان ربنا اداني عقل - غبي والله - احسن من غيري يبقى استهين بعقول البقية .. والله أبدًا .. بس فيه حاجات فعلا كده بتكرهك في نفسك
بتحتاج علاج
انا ممكن تلاقيلي تعليقات عند ناس عمرها عشر سنوات وبتابع ومبسوط باللي بتكتبه جدًا كمان بس عشان عرفوا يعبروا صح
ده كل النقطة
الموضوع بعيد تمامًا عن الذكاء العقلي وله علاقة وثيقة الصلة بالنقطة .. الله ينور عليكي
والله كنت هقول جالكسي في الاول بس قلت عشان الزوار ميقولوش عليا من اتباع امريكا !
سلام

EMMY BABY said...

اولا سلام عليكم

شاكرين مهللين يا استاذ طارق على حلك للواجب

المرة دى بدون تعليق

تحياتى

ايمى

كيارا said...

اجابات جميله اوي بس بالنسبه للمدونات اللي من النوع اللي ذكرته اعتقد ان ده احساسهم وطرحوه بالشكل الذي يروق لم وليس بالشكل الذي يروق لنا

مجرد وجهه نظر

تحياتي

كيارا

ضى القمر said...

اجابات جميله يا طارق ..
خاصة
ايه أهم حاجة اتعلمتها من عالم التدوين ؟
إن العالم في سبعة مليار شخص وسبعة مليار وجهة نظر كلها صحيحة !!!!

والله معاك حق .. كثير بدخل مدونات بتطرح موضوع نقاشى .. بدخل اشوف الردود كل واحد برأى شكل ..
بس اجمل حاجه فى المدونات .. أن كل مدونه ليه لون وطعم مختلف ..
بجد عالم المدونات ده عالم ساحر .. اجمل كثيير من المنتديات .. ومشاكلها .

أجمل تحيه لك يا اخى ..
وخلاص همشى ومش هرغى كثير ..هههه

.:.-=- ELGaZaLy-=-.:. said...

حاسس ان التدوين له تأثير ؟


أكيد طبعًا , بس مع احترامي لكل المدونين


حاسس ان تأثير الشيبسي أحلى
-------------------------

قتلتنى الكلمة دى ضحكا بجد

Anonymous said...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

Anonymous said...

:]

دعاء مواجهات said...

مازلت مش قادرة الاقى تفسير لكلمة

تأثير الشيبسى احلى دى بجد

ياترى هزار ولا تقليل من اهميه التدوين اصلا؟؟

نورتنى

Gannah said...

طارق
انا عادة مش بجاوب على اى تاج بس المرة دى علشان خاطرك هجاوب
واجابتى هتبقى تقريبا تعليقى
واهم حاجة انى سعيدة انى اتعرفت عليك من عالم التدوين وكده يبقى التدوين له تأثير اكتر من الشيبسى شوية:)
تحياتى

Anonymous said...

لدينا قليلا من صعوبة في الاشتراك في آر إس إس ، وعلى أي حال لقد تميز الكتاب في هذا الموقع العظيم ، ومفيدة للغاية بالاضافة الى مليئة المعلومات.

Anonymous said...

وظيفة جيدة جدا.

Anonymous said...

شكرا لهذا المنصب مفيدة! لم أكن قد حصلت على هذا خلاف ذلك!