Tuesday, August 14, 2007

يوم ما بدأت ..

اضغط على الصورة لمشاهدتها بالحجم الكامل , اثق فى أنها ستنال اعجابك !
يوم أن بدأت فى الكتابة , كانت لى مقالات محدودة, لا داعى لنشرها هنا حتى لا تظهر الفضائح , ولكن اليكم بعض المقالات التى كتبت فى العام 2006 قبل ان أتوقف عن كتابة مقالات المعارضة


دم مصر .. ودمك يا ريس !
نشر الساعة: 1:36 AM بتاريخ: 8/25/2006 الكاتب: طارق عميرة
أترى ان فقأت عينيك ووضعت جوهرتين مكانهما .. فهل ترى ؟؟هى أشياء لا شترى!
أمل دنقل
***
يمكن القول بأن حادثة قطار قليوب كانت من أبغض الحوادث على الاطلاق .. الاستغلال التجارى السيء من أصحاب سيارات الاجرةوالسرافيس للحادث ورفع الاجرة الى الضعف مع المتاجرة بدماء اخوانهم الستة وخمسون شهيدا طبقا لاخر الاحصاءات !
والمئةوثمانية اربعون مصابا والذين لم تشفى جراحهم بعد نظرا لاهمال جهاز السكك الحديدية ..وهوا من امتى مش مهمل ؟؟
انا بقالى سنتين بروحكلمناطق الجمهوريةمن خلال سيادته ولازم يكون فيه تأخير شنيع فى كل الدرجات وخاصة لما تكون محطة مش رئيسية ..او رئيسية بس مش مركز توقف قطارات !
ما علينا مش ده المشكلة !
المشكلة ان حضراتكم ممكن تشوفوا ضحايا الحرب فى اسرائيل وتشوفوا هما كام !.. 50؟ 100؟ 150؟ هنقول 200 يا عم عشان الزعل !
شوف مات عندنا كام فى حادثة قطارات بسيطة وعربية واحده .. 56 واحد يا رداله .. 56 مصري يا اخواننا .. يعنى ربع ضحايا الحرب او ضعف ضحايا الحرب من المدنيين !
متخيلين حجم الكارثة ؟؟
همم طب تعالوا نلاحظ حاجه كمان ..
بص كده على شريط اخبار الجزيرة اللى بتتابع الفلبين .. ياعم بص على اى حاجه تانيه .. يا عم ارجع بذاكرتك لضحايا الارهاب فى لندن او الرياض اوحتى دهب عندنا .. فيهم حد وصل للخمسين ؟؟
طبعا لا .. بتشوف ضحايا بالخمسين فى حادثة قطر او عبارة اللهم الا الفيضانات والزلازل؟؟
ها . جاوبنى ؟؟
ايوة بالظبط .. الاجابة لا
طب دمنا رخيص وده حاجه معروفة ومش عايزين له اى تمن اكرملنا من اننا ناخد تمن برخص التراب !
طب دم مصر .. ايوة مصر .. بلدى وبلدك يا مصرى .. بلدى وبلدك يا عربي .. مصر بلدنا يا رجاله .. مصر يا اخواننا .. دم مصر اللى بقى برخص التراب قدام كلاب الاعداء .. الدم ده يا شباب من يخليه بغلا الدهب تانى؟؟
طيب تعالوا ندور على دم مصر ونشوف اللى خلاه برخص التراب مع ان التراب مالوش تمن اصلا :-
اولا :- مواقف الحاكم العربي والحاكم بامر نفسه محمد حسنى مبارك وتأييده الكامل لاسرائيل وامدادها بالبترول والغاز والحديد والذى منه
ثانيا :-مواقف العاملين بامر الرئيس السادة وزراء الخارجية والداخلية والسيد رئيس الوزراء نظف الله وجهه
ثالثا :- عدم اهتمام اوعدم اكتراث الشعب بما يحدث واستغلال الاغنياء واصحاب الشركات لما يحدث ورفع اسعار كل شيء فيعمل الفرد طوال اليوم ليوفر سعر زجاجة زيت يعود بها لاولاده .. وهذا يكون تحت سمع وبصر رجال الدولة سحلهم الله كما سحلوا عابديه
رابعا :-موقف الدولة من المعارضين والرأى الحر والحمد لله بدأت تفكشوية والا كان العبد لله فى السجن من أول مقال كتبه
خامسا :- لله الأمر من قبل ومن بعد
وكفايةكده النهارده
وعقبال الكارثة الجاية يا ريس .. ونحرص على ان تكون فى عهد سيادتك لتزيد الصحف والمجلات والاعلام باراءتك الحكيمة واداناتك الرشيدة لما يحدث فى بلدك تحت سمعك وبصرك
وشكرا


الذين دمروا الجنة !
نشر الساعة: 7:43 PM بتاريخ: 7/24/2006 الكاتب: طارق عميرة
بالتأكيد كنت أحد المحظوظين بمشاهدة ما يحدث فى لبنان ..أو أحد المحظوظين بسماع ما يحدث هنالك .. وبالتأكيد ايضا أحد المحظوظين بعدم التواجد هناك فى هذا الوقت .. وربما كذلك كان حظك كبيرا فكنت أحد الفارين من هناك والعائدين الى بلدتهم .. او التاركين لبلادهم بلا دعم فى اشد اوقاتها حرجا ..
عموما .. لا يهمنى من أنت ولا ما هو أثر الموضوع عليك .. فليتحدث كل منا عن رؤيته الخاصة ..اما عن رؤيتى الخاصة فلا رأى خاص لى لان ما اقوله هو الواقع.. فكما نرى موقف حكامنا العرب العظيم والذى لم اتوقع مطلقا ان يكونوا بهذه الشهامة والعروبة ..فقد كان اول رد فعل مصري .. هو قلق وزير الخارجية السيد أحمد ابو الغيظ - حفظه الله ورعاه لمصر - ازاء التصعيد الحادث فى الاراضى الفلسطينية واللبنانية .. وقد تناقلت وسائل الاعلام الخبر كاننا هددنا اسرائيل بافناءها اذا تدخل قذر منهم فى ارض لبنان ..كان رد الفعل - القلق ازاء التصعيد -- كما ترون خارقا للغاية وقد جعل هذا المصريين يمسكون قلوبهم بايديهم وهم موقنون اننا الهدف المقبل !
وكان رد الفعل الثانى ادانة من الملك عبدالله ملك الاردن والملك عبدالله ملك السعودية والرئيس العابد لله - ايضا - محمد حسنى مبارك لحزب الله على ما فعله فى اسرائيل .. كيف يفعل حزب الله هذا باسرائيل ..ان الاسرائيليين ضعفاء ومساكين فى حين كانت هناك بعض الادانات التى لا قيمة لها والتى لم يتخذ اى موقف ايجابي من خلالها لما فعله الاسرائيليين فى غزة على عكس ما حدث مع حزب الله فقد كانت الادانات شديدة وعلى الحزب ان يتحمل الملوخية ..- عفوا .. المسئولية
وفى حين اثبت حزب الله بقيادة حسن نصر الله الوغد الذى لا يجازف بنفسه بل يجازف باولاده فقط .. انه هو حزب المتخلفين الوحيد على الساحة وان ما فعله حماقة كبري.. لا يدرك هذا الاحمق ان الدول العربية تعشق اسرائيل ولو ادرك هذا لجلب لها عنترة ابن شداد لينظ لها قصائد فى العشق والهيام كما يفعل موالسونا .. و لاحتضن اى اسرائيلى كما فعل الرئيس مبارك - جعله الله ذخرا لمصر - مع اولمرت اثناء زيارته لنا والمصريون يقتلون على الحدود
اما الموقف الدولى فهو ما بين معارض ومندد ومستنكر ومشجب ومؤيد ومساعد وموافق لما يحدث ..ولا شيء اخر .. ولاخطوة ايجابية اخرى .. واعتقد ان احدا لن يتدخل حتى تنهى اسرائيل شحنة المتفجرات التى وصلتها من يونايتد ستيتس اوف امريكا .. وحتى تفنى لبنان او تبنى اسرائيل منطقتها العازلة ..
اما عن الجيش اللبنانى فحدث ولا حرج .. اى جيش هذا .. واى بطيخ .. ان ما حدث يعنى بشدة ان لبنان لا تملك جيشا يكفى لحراسة ايميل لحود نفسه .. او ان الجيش قد ضرب او انه لن يجازف بنفسه الا فى احلك المواقف التى لا ادرى اين ومتى ستاتى وما هذه المواقف التى نحن فيها الان .. الامل كله متمثل فى حزب الله اللبنانى بقيادة الشيخ حسن نصر الله والذى اثبت بالادلة القاطعة ان المنطقة لا يوجد بها ظل رجل !
هناك من يعيب على الاخ حسن نصر الله لانه يقتل المدنيين ولانه شيعى فلن يساعده السنه ولكنهم تجاهلوا منصبه السياسي وان حزب الله يحوى مسيحين وسنة وليس مجرد حزب شيعى يجاهد لارساء تعاليم الشيعة !
اما عن قتل المدنيين .. فالعصر عصر الصواريخ يا سادة .. لم يعد هناك رجل لرجل ولن تراهما فى ميدان القتال مرة اخرى الا ان يهبط المهدى المنتظر فيعود الجهاد للسيف والرمح والسهام .. والاخ حسن نصر الله لا بد ان يرسل صواريخه .. ورايي الشخصى ان المدنيين يستحقون ماحدث لهم لسببين .. 1 - اسرائيل مجتمع عسكرى بالدرجة الاولى وكل من فيه مر بمرحلة التجنيد .. وكل منهم له دور مقبل .. ام الثانى فهو انه حين تغتصب ارض لى فادافع عنها ضد من قطنوها ومن سكنوها وهم يعلمون انها مغتصبه وان مت وانا ادافع عنها فسأهد من الشهداء .. وهذه ارضنا ولكنى لا اعلم لماذا نحن صامتون ..
الان قد دمرت بيروت ولبنان عامة ونحن نشاهد ونأكل الفيشار ونقول :- ياااااااااى .. تريبول !
عودة للمواقف العربية .. ان كان للعرب مواقف .. بقية الحكومات لم ين لها دور يذكر بينما كانت الشعوب هى المتحدثة والرافضة ولكنهم للاسف فى نظر الحكام .. مجموعة من الجهلة - لا يعرفون عن السياسة شيئا !!




مبارك .. والتاريخ المصري الأسود !
نشر الساعة: 4:40 AM بتاريخ: 5/31/2006 الكاتب: طارق عميرة
من الممتع للنفس وما يثير الضحك فى النفوس ان تمشي فى شوارع مصر المحروسة وتتطلع الى الديموقراطية التى تملأ الوطن حتى صارت تباع بالكيلو !!
ديموقراطية فى كل مكان .. محطات الاذاعة .. التلفزيون .. الصحف القومية التى يبدو أنها تصدر عن موزنبيق اصلا ولا علاقة لها بالواقع المصرى نهائيا ولن اعلق بما قاله الالاف من قبلى فنحن نعلم جيدا انهم موالسون " الاجهزة الثلاثة " فعند سحل القضاة وهتك عرض الصحفيات ..واعتقال المعارضين .. فتبرير الامر سهل للغاية .. لقد قام المذكورون اعلاه باغلاق طريق رمسيس وهو شارع حيوي للغاية فى مصر مما ادى الى تعطل المرور فترتب عنه خسائر عشرة جنيه فى الاعمال وهذا يعنى اننا لن نتوانى عن الاصلاح ولن نتراجع عن المضى قدما فى طريق التطور ..والديموقراطية تمضى على قدم وساق وهذا حتى لا يقوم الاخوة المعارضون بحشد جموعهم واغلاق الطريق مرة أخرى !!
طب بذمتكم يا حضرات الموالسين كان فى كام عسكرى امن مركزى هناك .. وكان فيه كام متظاهر !!!!
ما علينا
المواطن المصرى لم يساوى شيئا فى اى عصر اللهم عصر الفتح الاسلامى ولن يساوى شيئا بعد اليوم .. امر مفروغ منه واتضح بشدة فى حادثة العبارة المنكوبة وارى بعين الخيال اسماك القرش تتعازم .. حد عايز مصرى مشوى .. طعمه حلو .. مصرى مقلى
والكل يعلم ان كل مسافر قد حزم امتعته ولملم ثروته خلال العام او المدة التى قضاها بالخارج ليعود بها الى مصر وترك تقدير الثروات متروك لسيادتكم ..ولكن بعد هذا يتم تعويض المصرى الناجى الذى ظل يصارع المياه لمدة يوم او يزيد وقد اصابه الياس لتأتى الرحمة الالهية متمثلة فى ادراك بعض المسئولين فى الدولة انه كانت هناك عبارة وانها لم تصل فى موعدها منذ 10 ساعات على الاقل وانه يجب علينا ان نرى ما يمكن نفعله ازاء هذا الامر .. ومن ثم ينتظر الغريق بينما يجرى الامر هنا بروتينية مملة حتى تصل مراكب الانقاذ وتنقذ الذراع المتبقية منه ان افلتتها سمكة القرش !!
طب عادى .. عبارة غرقت قضاء وقدر .. مفيهاش حاجه .. احنا مالناش دعوه ومش مسئولين عن الموضوع .. يا راجل ؟؟
طب انفلونزا الطيور كان لازم صحف المعارضة تفضحكم انها موجودة فى مصر قبل ما وزارة الصحة تعلن كده رسميا ويموت 13 مصري وخمسه بحاله جيده .. حسب احصاءات الصحف الموالسة ..طيب وماله خير وبركة .. المصريين 70 مليون هيضرهم ايه يعنى لما يموت 13..هوا من امتى المصرى ليه تمن .. لا ده بصراحه شديدة انا معاكم فيها ..بس يا راجل ده مهزلة الانتخابات كبرت اوى
انتخابات ايه .. احم .. حضرتك لما انا اروح اصوت - والله كنت هصوت لمبارك من غير حاجه - بس اسال الراجل على اسمى يقولى انتا انتخبت خلاص .. قلتله ازاى يعنى .. يقوللى زى الناس .. طبعا مش هقولك على الفرح اللى كنت فيه وانا ماشى ..هيييييييييييييه فى واحد متنكر فى هيئتى بيحب الريس زيي ودخل انتخبه .. وماله .. طبعا بقيت فى قمة الانكشاح وقلت دنا عايز اطلع شهادة ميلاد يكونش الاخ طلعهالى اصل محتاجها فى موضوع كده !!!
ده انا مدين للدولة فعلا بانها سهلت عليا الموضوع ده ..
طب حركة كفاية ... والاخوان المسلمين وانتخابات مجلس الشعب .. انا عارف ان الاخوان متعصبين وله تاريخ اسود وميستحقوش كراسي البرلمان ..وعشان كده وطبقا لتصريحات دكتور احمد نظيف تم حرمانهم من اكثر من 40 مقعد اخر وهذه ديموقراطية من النوع الثقيل الذى نتمنى ان نراه فى حياتنا !!!
طبعا الموضوع كان على ايدى .. صحيح ان فى دايرتنا -موجودة فى مجرة درب التبانه على فكرة - بتاع الحزب مخلاش حد ينتخب بتاع الاخوان بالعافية - وهتوا عرض اخته قدام عينى اللى هياكلهم الدود والمصحف - بس الحمد لله بتاع الحزب قعد يتحسر هوا كمان على الكرسي بعدها لانه بيبيض بقاله تلات دورات عليه !!
بالمناسبة يا ريس.. مش عارف من حق الشعب يبوسك ولا لا بس بصفتنا فى وطن ديموقراطى من الطراز الاول عايز ابعتلك بوسة عشان بطولة القلل الافريقية لانها كانت تحفة فعلا .. تحفة بكل المقاييس البطيخيه .. بس التلفزيون المصرى - الموالس - اخل فيها بالاداب
.. وطبعا فى الايام الاخيرة ازمة القضاة اللى كانت جرعة الديموقراطية فيها زيادة شوية انا معاك يا باشا فى سجن القضاة وسحلهم وضربهم على قفاهم .. ناكرين للنعمه وجاحدين للجميل ازاى يبقوا فى مصر وميبوسوش رجل سيادتك .. لا لا الموضوع كده فى حاجه غلط .. لازم يتسجنوا وكمان المحامين بالمرة وعلى فكرة المشايخ بيدعوا عليك فى سرهم سايبهم ليه يا عم ؟؟ مش هتغلب يعنى تجيب كمان نص مليون واحد امن وتشترى كام حتة ارض فلوسك كتير ما شاء الله - تعمل الارض ده سجن للشعب كله ..
وفى النهاية وبكل سرور وانا عارف المكان الذى ينتظرنى بعد كتابة هذا المقال وربنا يستر
اقول لحضرتك يا ريس
مزبلة التاريخ مستنية حضرتك ..اكتب تاريخك الاسود .. اكتب سيادتك !!
مواطن مصرى ميستحقش الحياة لانه بيكره سيادتك

3 Comments:

الأستاذ said...

هقرأ البوست قريب لأنه طويل الصراحة لكن أنا شدني فعلاً الكتاب لأني ممن يدعون انهم يملكون تلك الملكة "التليباثي" ولكنني ممن لا يستخدمونها بإرادتهم
تحياتي

Anonymous said...

فيييييينك ؟

Anonymous said...

والله؟