أفكَار مِن ملامَح ساحِرَة !

أفكار من ملامح ساحرة

طارق عميرة *(1)
-1-
كان نفسِي يا عُمري نغيّر فكرة ..
ممكن يوم الحبّ الصدِق يعرَف بكرَة ..
ممكن حب يعيش لسنين
يكسر كل اسوارَ الكُون
يخلِف اعرَاف التانيين
يكتب قصة بقاعدَة جدِيدَة
ويدون في كتَاب قوانِين
إن الحب السهل بيصعَب
وإن الحب الصعب بيكمَل
مش كل الحواديت ناقصِين ..
كان نفسي يا عمري نقول للقهْر
بطّل نارَك
مهما سكنت عقول وقلوب
دي مش دارَك
أصل القهر ماشي يقول
انا دايما بكسب علطول
كان نفسي يا عمري يكون الرد
تيت تيت
مشـــغــول!
-2-
فاكرة يا عمري
في عز البرد
وايدي في ايدك
فاكرة طريق مليان بمخاطر
مش شايفينها
وكلامي الساكت يناديلك ؟
وعينيا بتسأل بمواجع ..
عن سر الحزن اللي في عينك ؟
كان كلمة واحدة تطمني ..
بتخلي القلب يغنيلك
لكن كان ..
كان يا ما كان
من أزمان
أنا دلوقتي نسيت احساسي بأي امان
فسي في كلمة
نفسي في نظرة يتيمة في وشك
نفسي في لمحة في أي مكان ..
فاكرة يا عمري
فاكرة كلامنا عن الادمان ؟
وكلامنا عن طول الغربة ..
عن روعة الحب زمان !!
-3-
عارفة يا عمري ان إنتي الثورَة
إنتي الطول والسنة والأرض
إنتي ملامح حلم قديم ..
حلم عشانه عملت كتير ..
وهعمل لسه
صورة واخده وقت كبير ..
مهياش حاسة
ان الوضع النفسي لنفسي
أصبح اسوأ وضع خطير
وإن الروح الساكنة في روحي
نفس الصورة ..
وكم جروح حوالين الرّوح
وإن مناطق فيها كتير
مش معمورَة
وإن الروح لو طلعت منّي
هفضل حي ..
واي حياة تنفع مهجورَة ؟
طبعًا عارفة يا عمري إن إنتي ..
هيا الصورَة !

______________________________

هامش :

*(1) طارق عميرة كائن حي يتعايش في طنطا ويتغذى على اللحوم والخضروات وأتم عامه الثاني والعشرين بلا أهمية في الأول من مارس .